"Шетел қазақтарына қазақ тілін оқытатын әмбебап оқулықтар көп емес. Сондықтан "Қазақ тілі" әмбебап оқулығын шығару бастамасының өзі үлкен жоба. Оқулықтың құрылымы, әдістемесі, практикалық тапсырмалар жақсы берілген. Қазір біз қазақ-түрік тіліндегі оқулықты апробациядан өткізіп жатырмыз. Ішінара түзетулерді қажет ететін мәселелер бар, оны бірге түзетеміз деп ойлаймын",- дейді Хаджеттепе университеті оқытушысы, "Көк Ту" қазақ мәдениеті қоғамы, қазақ тілі курсының үйлестірушісі Салтанат Ұзақбайқызы.

Қазақ тілі А1, А2 әмбебап оқулығы 6 тілде әзірленді. Оқулықтың мақсаты - шетелдегі қазақ диаспорасына арналған әмбебап оқулығы тіл үйренушілердің тілдік қарым-қатынас әрекеттері мен тыңдап-түсіну, жазылым, сөйлесім, дағдыларын қалыптастыруды көздейді.

Міндеттері:

- ауызша және жазбаша қарым-қатынас жасау;

- қажеттілікке сай сұрақтар қою;

- қарапайым сұрақтарға жауап беру.

Оқулық құрылымы мен берілген тапсырмалар күнделікті жағдаяттарға негізделіп жасалған.

Айта кетейік, «Қазақ тілі» (А1-А2 деңгейлері) әмбебап оқулығының тұсаукесері 2022 жылдың 21 ақпанында сағат 11:00-де онлайн режімде (ZOOM платформасында) өтеді.